10 қыркүйек күні "Адай ата - Отпан тау" кешенінде қазақтың бард-ақыны Табылды Досымовтың 60 жылдығына арналған дәстүрлі "Биіктік" шарасы дүрілдеп өтті. Шараға өлкеміздің түкпір-түкпірінен гитарамен ән салатын атышулы өнерпаздар қатысты. Атап айтар болсақ: Айгүл Құбаш, Асанәлі Көшеров, Рафхат Ізден, Асылбек Құрманов сынды өнер жұлдыздарымен қатар Бақдаулет Толыбекұлы, Жомарт Маратов, Құрман Кенжеғали, Елубай Мұратов, Дәурен Тәжімұханов сынды болашағынан үлкен үміт күттірер өнерпаздар да Табылдыға арналған кештің сәнін келтірді. Бұл ән кешінде жастармен қатар 67 жастағы Басбаев Сәли ағамыз да Табылдының рухы үшін бар өнерін аямады. Әнші Айгүл Құбаш Табылды Досымов атындағы алғашқы "Сәйгүлік" конкурсының жеңімпазы болса, Боранқұл ауылының өнерпазы Дәурен Тәжімұханов Индерде өткен соңғы аймақтық конкурстың лауреаты болды. Ән кешіне арнайы келген Қазақстан Жазушылар және Журналистер Одақтарының мүшесі, ақын-сазгер Ерекен Қорабаев Т.Досымовқа арнаған "Жаңғырды тауда Табылды ән" арнауын көпшілікке тарту етті.