«Өмірі өнерімен өрнектелген»

Үстіміздегі жылдың қазан айының 31 күні «Адай ата – Отпан тау» тарихи-мәдени кешенінде ҚР мәдениет саласының үздігі, саяси және қоғам қайраткері, сазгер, бард-ақын, мекеме ардагері Данияр Аралбаевтың шығармашылығына арналған «Өмірі өнерімен өрнектелген» атты шара болып өтті. Шара мақсаты: өлкемізге, респубикаға белгілі ардагеріміздің өнегелі өнерін жас ұрпаққа насихаттау, рухани қазынамыздың бірі – қазақи әндер мен киелі өлең екенін жастарға ұғындырып, сіңіру болатын.

Шараға ҚР Журналистер одағының мүшелері Мейрамбай Қибасов, «Парасат» қозғалысының байырғы мүшесі,  мәдениет саласының ардагері Гүлжамал Тынымбайқызы, Амал мерекесін өткізуді ұйымдастыратын жұмысшы тобының мүшесі, Дәкеңнің қанаттас інілерінің бірі Құралбай Қарабалаев, «Парасат» қозғалысының мүшесі,өлкемізде алғаш КВН ұйымдастырушылардың бірі, кәсіпкер Данияр Айса, «Отпан» ауылдық округінің әкімі Орынғали Күзембаев қатысып Данияр Аралбайұлының тума таланты мен еңбекқорлығын, елжанды елгезектігін, өнер мен достыққа адалдығын атап айтып, Дәкеңе жылы лебіздері мен шынайы ақ тіліектерін арнады. Сонымен қатар шараға Ақтау қаласының И.Сүйеубаев атындағы №8 орта мектептің оқушылары (жетекшісі Сәтқанова Гүлназ) қатысты.

Шара барысында Дәкеңнің бірнеше әндері сөзінің авторы, ҚР  Журналистер Одағының мүшесі, тележурналист Қожахмет Демеубергенұлының Дәкеңнің 70 жылдық мерейтойына арнап түсірген бейнефильмі тамашаланды. Өлкемізге ғана емес республикаға белгілі әншілер Асқар Көшеров, Жасұлан Өмірзақов, Серіжан Масжанов пен Аида Байгелова Данияр Аралбайұлының бірнеше әндерін орындап,қатысушылардың алғысына бөленді.

Шара соңында Данияр аға 70 жылдыққа байланысты Абай атындағы мәдениет сарайында өткен шығармашылық кешті ұйымдастыруға атсалысқан Мейрамбай Қибасов пен демеушілік көрсеткен Данияр Айсаның иықтарына қазақы дәстүрмен шапан жапты.

Кешеннің бөлім меңгерушісі Жомарт Айдарбек