«КӨКМОЙНАҚ» командасына құрмет көрсетілді

8 маусым күні "Адай ата- Отпан тау" кешені және "Ұлы дала жорығы" РҚБ Маңғыстау облыстық филиалы өкілдерінің ұйымдастыруымен облыстың жаңа әкімі Н.И.Қилыбай мен биылғы "Ұлы дала жорығы" марафонында жүлделі 2-орын алған "Көкмойнақ" командасы мүшелерінің кездесуі өтті. Кездесуге облыс әкімінің орынбасарлары Е.Ізбергенов, А.Өрісбаев, Т.Әбішев, Маңғыстау облысы "Жорық" федерациясының президенті И.Қалдаманов, "Көкмойнақ" командасының атбегілері Б.Мұқырбаев, Д.Тұқымбай, демеуші Р.Борашев, биылғы "Ұлы дала жорығы-2024" марафонына қатысқан шабандоздар Нұрсағын Тұқымбай, Мағжан Абдолұлы, Тұрарбек Болатұлы, Ерболат Жаңбырбай, Нұрсұлтан Құмарова, т.б. және "Көкмойнақ" командасының жанкүйерлері қатысты.

Кездесуге қатысушылар әуелі Адай ата кесенесіне зиярат етіп, батыр бабалар рухына , дұға қылып, кешендегі ескерткіштерді тамашалап, Ақсарай мұражайын аралады. Одан кейін "Қарашаңырақта" жиналған көпшілікпен кездесу өтті және марафон жүлдегерлерінің құрметіне қонақасы берілді. Қонақасы соңынан ел ақсақалдары мен Бекет ата ұрпақтары ел азаттары мен атбегі, шабандоздарға баталарын беріп, бабалар рухына құран бағыштады.