Кешенде мажарлық қазақ ғалымымен кездесу өтті.

11 сәуір күні «Адай ата – Отпан тау» тарихи-мәдени кешеніне Венгриядағы Лакителек ұлттық шығыстану университеті шығыс бөлімінің оқытушысы, «Барыс – Венгр – Қазақ» қоры президентінің орынбасары, ғалым жерлесіміз Оңайша Мақсымқызы Мандоки арнайы ат басын бұрып келді. Қазақстан мен Венгер мемлекетінің ортасында алтын көпір болып, бірнеше ғасыр бұрын осы қазақ даласынан ауа көшкен 200 мыңдай қыпшақтың қазіргі ұрпақтарын түп тамырын тануына ықпал етіп, қазақтың салт-дәстүрін, тілі мен мәдениетін үйретіп жүрген ғалым апайымыз Адай ата кесенесіне, зиярат етіп, Көкбөрі, Ұранот тұғыры, Ана келбеті ескерткіштерін тамашалап, Ақсарай мұражайын ықыласпен аралады. Кешен идеясының авторы, ҚР еңбек сіңірген қайраткері, ақын Сабыр Адаймен сөйлесіп, кешеннің салыну мақсатын, тарихын тамсана тыңдады.