Қазақ халқы қай уақытта да асты жоғары бағалаған. Халық арасында "Астан ұлы емессiң", "Ердi қорласаң састырар, асты қорласаң құстырар" ,"Ауру - астан..." деген мақал-мәтелдер бар.

Осы орайда 1 тамыз күні «Адай ата – Отпан тау» кешенінде ұлттық тағамдарымыздың адам денсаулығына пайдасы зор екенiн дәріптеп, насихаттайтын, жылда дәстүрлi түрде өткізілетiн "Берекелi дастархан" атты шара болып өттi. Шараға Алматы, Атырау, Ақтөбе, Құлсары, Ақтау қалаларынан келген қонақтар қатысты. Шараның негiзгi мақсаты: өскелең ұрпақты қазақ халқының тағамдарымен, тамақ пісіру әдістерімен, әдебімен таныстыра отырып, ұлттық тағамдарды дайындау, сақтау және тұтынудың ұлтымызға тән қалыптасқан мәдениетін насихаттап, дәріптеу.

Бүгiнгi шарада ұлттық сүт тағамдарымен қатар "Қарын бүрме" және "Әсiп" атты ет тағамдарының жасалу жолдары түсiндiрілiп, көрсетіліп, келген көрермен қонақтарға таныстырып, алдарына ұсынылды. Қонақтар тағамдардан ауыз тиіп, шараны жүргізуші және тағамдарды дайындаушы З.Еңсегеноваға жақсы баға беріп, жылы лебіздерін білдірді.