«Менің Қазақстаным»

24 мамыр күні облыстық, және Маңғыстау аудандық қорғаныс істері жөніндегі департаментінің қызметкерлері, әскер қатарындағы сарбаздар, әскер қатарына шақырылған жастар және олардың ата-аналары, 11 сынып оқушылары, еңбек ардагерлері, облыстық, аудандық БАҚ өкілдері қатысуымен ұйымдастырылған «Менің Қазақстаным» атты әскери-патриоттық шараға арналған жиын Ақсарай үстіндегі алаңда өтті. ҚР көк туы көтеріліп, Гимні орындалды «Отпан» кәсіпорны директоры міндетін атқарушы Д.Аралбай жиынға қатысушыларға арнап, арнайы сөз сөйлеп шараны ашып берді.

 ҚР мәдениет қайраткері әнші Жоламан Көшкінов шараны жүргізіп отырды. Облыстық қорғаныс істері жөніндегі департамент бастығының орынбасары Шади Абдуллаев, ақын Сабыр Адай, әскер қатарына шақырылған жастардың ата-аналары, әскер қатарында қызмет етіп жүрген сарбаздар өкілі сөз сөйлеп, әскерге шақырылған жастарды Отанына адал қызмет етуге шақырды. 

«Отпан» МКҚК-ның директоры м/а Данияр Аралбай, ақын Сабыр Адай әскер қатарына шақырылған жастарға арнайы бетшеге жазылған «Ата жұрт аманатын» тапсырды. Аманат тапсырылған жастар өкілінің бірі сөз алып, ата-баба салтымен өздеріне тапсырылған аманатты адал да абыроймен орындайтындарын айтып, әскер қатарына шақырылған жастар атынан уәде берді.

 Әскер қатарына шақырылған жастарға ақсақалдар атынан Маңғыстау облыстық алғашқы батагерлер байқауының жеңімпазы Сүйеуов Базархан Әбуұлы бата берді. Шара соңында арнайы шекара бөлімнің сарбаздары қоян-қолтық айқас соғыс өнерінен көріністер көрсетті.