"Құсбегі Арон Оспанғалиевпен кездесу"

2013 жылдың қазан айының 7-күні Отпан таудағы «Адай ата – Отпан тау» тарихи-мәдени кешенінде «Отпан» МКҚК  қызметкерлерінің ұйымдастыруымен Маңғыстау туризм колледжі студенттерінің  ата-бабамыздан келе жатқан төл өнер –құсбегілікті өміріне өзек қылып, өздігімен ізденіп, үйреніп, өлкемізде құсбегілікті, саятшылықты дамытуға атсалысып жүрген Шетпе кентінің тұрғыны Оспанғалиев Аронмен кездесу болды. Арон Оспанғалиев 1975 жылы Шетпе кентінде дүниеге келіп, 1992 жылы Алшын Меңдалиев атындағы №3 орта мектепті бітірген. Құсбегілікпен айналысқанына 3 жылдай уақыт болған.

Осы жылдың ақпан айында Тараз қаласында өткен «Қауырсын» құсбегілер клубының 30 жылдығына арналған республикалық құсбегілер сайысында жүлделі 3 орынға ие болған. Кездесуді «Отпан» кәсіпорны тарих бөлімінің меңгерушісі Жомарт Айдарбек  ашып, құсбегілік, саятшылық жөнінде қысқаша әңгімелеп, сөз кезегін қонаққа берді.